sanê omnon bi
ma sero asmên
jê sıniya şêmıne bereqiyêne
asme be astaru ra verdênê têdıma
serva ma domonu gulase guretênê
taniya vırara dêkunê xo de
sanıku de.....
Hesê Bırri, Alık u Fatıke
ma rê biyêne eskera
pia şiyênê a dına, amênê na dina.
Sodırane ke biyêne
verê her boni de
jê gırpa, gırpa sazu
vengê reukunê doy bi
raywan biyênê meymani
cı rê doê serdın
hêmgen u ron u thoraqo teze
haleta domonu
çhancolik u henê kemere
der u cırano khulelık
çêveri boşt ser rakerdey
tı vana; robari teyna hetê ma de biyênê
kınc u koli wela adıri de gıriyênê
biyêne jê perrê qılançıka sıpiye.
Dıma, phoştia ma de barê na dina
reçê xo şiyênê gınêne ro gundunê vırênu
tey veng u sedawa dêk u khalıku
jê orğanê nermi ma piştênê têra.
Rau ra, ko u gerısu ra
ma sero torg u torjile ge ki tiji
bınê şiya darunê mojênu de
oreşiyêne ra....
wastênê ma, jê mınetunê dêkunê ma
homete rê rındiye, haştiye, têdustêni
mısawra, yaraniye u kuretey
lawuku de vengê cêncêni
kınarê çhemi bi
tabiyat xemeliyae
lızgunê daru ra theyıri fırrdênê
renga, reng boa çiçeg u vilıku
adıro harr sero
çaê awa Munzıri bi.
Waxtê de....
fıkırê ma ki şibi ro cêncênia ma
nême ğeyal, nême raştiye, tene tamaşiye.
Asma Marte - 2017
