Eve hewrunê xuyê şiau ra
Domono ke gopıkê teliyu qırfneno, jê dey
Kay bıke, gılê darê mojênun u kou ra
Hama nêşikina pêskarê dina mı be
Ne gomeo ke to mı rê nêvırasto
Ne ki lozına mına ke nêwazena dü kero.
Sıma Haqê ke na hard u asmêni seroê
Nêzon ke hondê sıma nêçari estê
Eve qemçurê qırvani...
Helmê mınete ra benê weyiye
Biyaena sımawa bımbareke zar u zor pay ra
Budelaê ke sıma ra gırêdaiyê
Domon u parskerdoği ke nêbiyêne
Sıma rewra biyêne vind, şiyêne.
Ez ke domon bine
Mı ke nêzonêne se kerine
Xo çarnêne ra hetê tiji ser
Çımê mı korriya to vinıtêne
Mı rê heni amêne ke, mıneta mı, heşina pê
Tı vana, cor de jü gos nano ro mı ser
Tı vana, jü esto derdê mı rê beno derman
Cor de, jü zerrie esta menda ra ê mı.
Verva dêvunê harru
Kami phoşt dê be mı?
Kami merdene ra ez xelesnune ra?
Kami bındestêni ra ez xelesnune ra?
Na zerria mına bele niya?
Zerria mına bela ke adıro bımbarek ra vêsena
Heqberê her karia....
A niya, kuna ra cos, xo ser ra sona
Uyo ke cor de hewn dero, ey xapnena
Sarê mı bela ra xelesnena ra.
Gunê ez to bımbarek kerine? Serva çınay?
Uyo ke derdê xo rê derman nêvineno
Tı coru derdê dey rê biya derman?
İyê ke sarê xo derd dero
Tı coru hêştirê çımê dine kerdi paki?
Kami ez kerdune mordem?
Zamano ke her çi ra qewetıno
Qedero ke bêver u bêpeyo, o niyo?
İ niyê?
Efendiyê mıne, tüye?
Mebo ke tı vazê,
Ez weşiye ra benune bêzar?
Mebo ke tı vazê...
Hona ke toxımê ğeyalu pêro ra nêbiyê
Remon son yazı u yavanu.
Nia de, ez oncia hurendia xo derune
Mordemunê jê xo resnon ra
Jü dewr pêro pia jê mı...
Şikinê dezu boncê, bıbervê
Bıhuyiyê, sa be…
Tı eynê dine de niya.
Jê mı!...
___________________________________________________________________________.
* Prometheus: Na dina sero anarşisto de vırên u khano. Prometheuşi, Haqu rê xiyanetêni kerda, verva nêheqiye vejiyo! Sırê dinê ardo, do insonu. Zeuşi ra ‘adır tırto‘ sevkano de mitolojiko.
( Bu şiir Berfin JÊLE`nin "ANTOLOJİYÊ SAİRUNÊ DİNA" kitabından alınmıştır.) Çeviri: Berfin JÊLE
