xeylê waxto to sero vınden
dest u paê mı gırêdaiyê
çıqa ke to ra dürine....
to heşin pê, lal u kherr niyune
zerria xo ke to rê rakerine
ne malê mıno, ne mılkê mı
ne ki to ra qeyr kesê mı.
Sodırane.....
tiji ke gılê koê Mazgerdi sero zereq da
to sero kamci cano ke amo dina
mınetunê dêkunê ma de
eve vicdano pak u zerre ra
cı rê canweşiye, rındiye u haştiya
cokao ke çımê ma...
coru nan u sola keşi de nia
düri ra düri cerdunê to ra
phırrkaisê malê pheskuvio
têde vırqoşiyê....
pêsunê Jêle, Buyere u Xaskare ra.
De welat, welat
şüarê ma rew ra nuşiyê
ferejia ke bêvengime
tı dırvetın, ez dırvetın
mırozıniya mıno, to
ğemê kêş de nia
mı tı kerda kemere
sana be zerria xo
kuyê hewz u kometi
bon u qonaği
hêniyê awa serdıne
honıkiya şiya viyalu
kaykerdis u vostêna çhêl u çhuki?
Têde vengi bırriyay, bi vindi, şi
teyna sermınıtae pagê rıjiayiyê
bağ u baxçey ki bınê lıngu de şi
ax...vengê bêkeşiye.....
Ax, de welat, welat
zonen, haskerdena bêwayire jê nonê anculiya
hama, sewda mı to rê jê çhıkê mırrmoria
xoriyunê roê mı ra yena, çeku be çeku nuşina
têla thomıri de, thonê nağmeu de
verê tania lozıne de....
vırar u sanıkunê Yemos Xatune de, hewın de
hêştır u şüaru de lewê to derune, hayıgune.
2016
